ՀՀ-ԵՄ համաձայնագրի վավերացումը կարևոր է առաջին հերթին ՀՀ քաղաքացիների համար

• 11.04.2018, 19:19
• Աննա Կարապետյան
•  Եվրոպա,  «Հայացք» վերլուծական կենտրոն,  Հայաստան

Այսօր ՀՀ Ազգային ժողովի կողմից միաձայն վավերացրեց Հայաստանի և Եվրամիության միջև Համապարփակ և ընդլայնված գործընկերության վերաբերյալ համաձայնագիրը՝ նոր փուլ բացելով ՀՀ-ԵՄ հարաբերություններում:

Ճիշտ է, համաձայնագիրը դեռ պետք է վավերացվի ԵՄ անդամ բոլոր երկրների և Եվրախորհրդարանի կողմից (այս պահի դրությամբ գործընթացն առաջընթաց է գրանցում մերձբալթյան երկրներում), սակայն Հայաստանի կողմից վավերացումը մեկնարկ կտա նաև համաձայնագրի կիրարկմանը: Համաձայնագրի դրույթների գերակշիռ մասը ժամանակավոր կարգավիճակով ուժի մեջ կմտնի հունիսի 1-ից:

Եթե անդրադառնանք Հայաստանի կողմից համաձայնագրի վավերացման նշանակությանը, ապա կարելի է առանձնացնել երկու բաղադրիչ՝ քաղաքական և կիրառական:

Քաղաքական առումով ՀՀ կողմից համաձայնագրի նման արագ և, որ շատ կարևոր է, միաձայն վավերացումը քաղաքական կամքի դրսևորում էր: Սրանով Հայաստանը վճռականություն ցուցաբերեց՝ հնարավորինս արագ կյանքի կոչելու համաձայնագիրը և առաջ մղելու դրանով նախատեսված բարեփոխումները: Բացի այդ, պաշտոնական Երևանը ցույց տվեց, որ ԵՄ հետ համաձայնագրի կնքումը ոչ թե զուտ ցուցադրական քայլ էր՝ ապացուցող հավատարմությունը եվրոպական ինտեգրման ուղղությանը, այլև հարաբերությունները նոր մակարդակի  բարձրացնելու իրական կամքի դրսևորում:

Կիրառական առումով համաձայնագրի վավերացումը հնարավորություն կտա Հայաստանին ուժի մեջ մտցնել  համաձայնագրի մեծ մասը՝ գրեթե 80 տոկոսը: Նախատեսվում է, որ նախքան համաձայնագրի լիարժեք ուժի մեջ մտնելը տեղի կունենա համաձայնագրի մասնակի իրագործում՝ վերաբերող այն դրույթներին, որոնք առնչվում են ոչ թե ԵՄ անդամ առանձին երկրների, այլ հենց Եվրամիության իրավասություններին:  Դա, իր հերթին, հնարավորություն կտա մի շարք ոլորտներում մեկնարկել ԵՄ աջակցությամբ նախատեսվող բարեփոխումները:

Այսպիսով, Հայաստանը ոչ միայն բավարար քաղաքական կամք ցուցաբերեց, ԵԱՏՄ անդամ հանդիսանալով, Եվրամիության հետ իրավական նոր համաձայնագիր բանակցելու և ստորագրելու հարցում, այլև քաղաքական մեծ կամք և նախաձեռնողականություն է ցուցաբերում այդ համաձայնագրի կյանքի կոչման հարցում: Եթե համաձայնագրի ստորագրումը կարևոր էր, առաջին հերթին, ցույց տալու համար, որ եվրոպական և եվրասիական ինտեգրման գործընթացների համադրումը հնարավոր է՝ առանց բախումներ առաջացնելու, ապա համաձայնագրի կյանքի կոչումը կարևոր է հենց ՀՀ քաղաքացիների կյանքի որակը բարելավելու, բարեփոխումներն առաջ մղելու համար: