Նախագահը ողջունել է Գերմանիայի խորհրդարանականների այցը Ծիծեռնակաբերդ

• 12.03.2015, 22:30
•  Եվրոպա,  Աշխարհ,  Հայաստան

www.president.am

Նախագահ Սերժ Սարգսյանն այսօր ընդունել է Գերմանիայի Դաշնային Հանրապետության Բունդեսթագի պատգամավոր, «Դաշինք 90/Կանաչներ» կուսակցության համանախագահ Ջեմ Օզդեմիրի գլխավորած պատվիրակությանը: Այս մասին հայտնում է president.am-ը:

Նախագահը ողջունել է հյուրերին և նշել, որ Գերմանիայում պատկառելի կշիռ ունեցող կուսակցության ղեկավար և Բունդեսթագի պատգամավոր պարոն Օզդեմիրի այցն իր ուրույն ներդրումը կբերի հայ-գերմանական բարեկամական կապերի և միջխորհրդարանական համագործակցության հետագա ամրապնդման գործին: Նախագահը նշել է, որ Հայաստանում ծանոթ են Հայոց ցեղասպանության հարցում Ջեմ Օզդեմիրի հայացքներին և բարձր են գնահատում այդ ոճրագործությունը դատապարտելու և ճանաչելու՝ Թուրքիայի կառավարությանն ուղղված նրա կոչերը: Ողջունելով Գերմանիայի խորհրդարանականների այցը Ծիծեռնակաբերդի հուշահամալիր՝ Նախագահը խորհրդանշական է համարել, որ Ջեմ Օզդեմիրի պատվիրակության այցը Հայաստան կայանում է Հայոց ցեղասպանության 100-ամյա տարելիցին ընդառաջ:

Հանդիպմանը զրուցակիցներն անդրադարձել են Հայաստանի և Գերմանիայի միջև դինամիկ զարգացող քաղաքական երկխոսության բարձր մակարդակին և բազմաբնույթ համագործակցությանը, որը ներառում է առևտրատնտեսական, մշակութային, գիտակրթական, ռազմական, առողջապահական և մի շարք այլ ոլորտներ: Կողմերը գոհունակությամբ են նշել, որ շարունակաբար ընդլայնվում է երկկողմ իրավապայմանագրային դաշտը, ակտիվացել են տարբեր մակարդակի փոխայցելությունները, այդ թվում՝ խորհրդարանական ձևաչափով: Զրուցակիցները կարևորել են նաև հայ և գերմանացի խորհրդարանականների համագործակցությունը միջազգային կազմակերպությունների խորհրդարանական վեհաժողովների շրջանակներում:

Հանդիպմանն անդրադարձ է եղել Հայաստանի արտաքին քաղաքականության առաջնահերթություններին, ներքաղաքական կյանքին, այդ թվում՝ տարբեր ոլորտներում իրականացվող բարեփոխումներին, ինչպես նաև տարածաշրջանի խնդիրներին ու մարտահրավերներին: Այդ համատեքստում Նախագահ Սերժ Սարգսյանը ներկայացրել է ԼՂ հիմնախնդրի կարգավորման բանակցային գործընթացը:

Զրուցակիցները քննարկել են նաև Հայաստան-Եվրամիություն համագործակցությանը և այն զարգացնելու գործում Գերմանիայի հնարավոր աջակցությանը վերաբերող հարցեր: