ԵՄ պաշտոնյաները՝ շաբաթվա կարևորագույն դեպքերի մասին

• 06.06.2015, 15:21
•  Եվրոպա,  Աշխարհ

Շաբաթը Եվրոպայում հագեցած էր բավական հետաքրքիր իրադարձություններով ամենատարբեր թեմաների շուրջ: Սկսած Հունաստան - Եվրոպական միություն՝ պարտապան-պարտատեր հարաբերություններից, եվրագոտու հնարավոր բարեփոխումներից, վերջացրած՝ Ռուսաստանի կազմած ԵՄ քաղաքացիների «սև ցուցակով», ինչպես նաեւ Ուկրաինայի տարածքում տեղի ունեցած ամենաթարմ բախումներով:

ԵՄ բարձրաստիճան պաշտոնյաները ողողել են համացանցն իրենց զանազան հայտարարություններով թվարկված այս դեպքերի շուրջ, որոնք ներկայացնում ենք ստորև.

«Հունաստանի կողմից եվրագոտին լքելու հնարավորությունը  երբևէ չի դիտարկվել: Չնայած բոլոր տեսակի խոսակցություններին՝ դա տեղի չի ունենա, իսկ Հունաստանը մինչև 2020 թվականը 35 միլիարդ եվրո կստանա` տնտեսական բարեփոխումներ անցկացնելու պայմանով»: 

 Եվրոպական  հանձնաժողովի  ղեկավար Ժան Կլոդ Յունկեր

«Ես պարզապես ցնցված եմ կարդալով Ռուսաստանի «սև ցուցակը», որտեղ ընդգրկված են մեծ թվով Եվրոպական խորհրդարանի նշանավոր անդամներ: Սա պարզապես անընդունելի քայլ է ՌԴ կողմից, որը խոչընդոտում է հնարավոր կառուցողական երկխոսությանը, ինչի շնորհիվ հնարավոր էր ներկայիս աշխարհաքաղաքական ճգնաժամի պայմաններում խաղաղ լուծման ճանապարհներ գտնել: Չնայած իմ բոլոր պաշտոնական խնդրանքներին ռուսական իշխանություններին ուղղված ՝ «սև ցուցակը» հանրային դարձնելու և այնտեղ ներառված յուրաքանչյուր անհատի դեմ հիմնավոր փաստարկներ բերելու, մեր անդամները պարբերաբար կանգնեցվում են ռուսական սահմանի մոտ և հետ ուղարկվում: Ուստի ես ևս մեկ անգամ հորդորում եմ ՌԴ իշխանություններին ապահովել իրենց որոշումների թափանցիկությունը՝ թույլ տալով ԵՄ քաղաքացիներին հարկ եղած դեպքում բողոքարկելու նման որոշումները:»

Եվրոպական խորհրդարանի ղեկավար Մարտին Շուլց

«Մենք աշխատում ենք Ռուսաստանի հետ մի քանի ոլորտներում:  Իհարկե քաջ հայտնի է, որ մեր գլխավոր տարաձայնությունն ուկրաինական ճգնաժամի հետ է կապված: Բայց ուրիշ շատ հարցերով մենք համագործակցում ենք, ինչպես օրինակ Մերձավոր Արևելքում խաղաղություն հաստատելու խնդրով, Իրանի հետ բանակցություններ վարելու խնդրով և այլն: Իսկ Ուկրաինայի հարցը լուծելու համար պետք է միասին աշխատել մինսկյան համաձայնագրերը պատշաճորեն կիրառելու շուրջ: Դա և՛ եվրոպացիների, և՛ռուսների, և՛ հատկապես ուկրաինացիների շահերից է բխում:»

ԵՄ գերագույն հանձնակատար Ֆեդերիկա Մոգերինի