ԵՐԵՎԱՆ 0 C°
ՀՀ ԿԲ -
  • USD - 483.94 դրամ +0,94 EUR - 512.2 դրամ +0,2 RUB - 7.88 դրամ +0,88 GBP - 595.54 դրամ +0,54
  • ՈՍԿԻ - 19 422,9 դրամ ԱՐԾԱԹ - 228,34 դրամ ՊԼԱՏԻՆ - 12 259,22 դրամ

Ի՞նչ արտաքին քաղաքականություն է առաջարկում Հայ Հեղափոխական Դաշնակցությունը

Հայ Հեղափոխական Դաշնակցությունը (ՀՅԴ) հայ ազգային սոցիալիստական կուսակցություն է՝ հիմնադրված 1890 թ.-ին Թիֆլիսում: Կուսակցությունը գործում է Հայաստանի Հանրապետությունում, Լեռնային Ղարաբաղի Հանրապետությունում և սփյուռքի ավելի քան 40 երկրներում։ ՀՅԴ-ն ևս մասնակցում է սույն թվականի դեկտեմբերի 9-ին կայանալիք ՀՀ Ազգային Ժողովի արտահերթ ընտրություններին՝ «Հավատարիմ հողին ու հային» կարգախոսի ներքո:

Ձեր ուշադրությանն ենք ներկայացնում ՀՅԴ նախընտրական ծրագրի այն հատվածները, որոնք վերաբերում են Հայաստանի արտաքին քաղաքականությանը՝ զուգահեռաբար անդրադառնալով նաև կուսակցության ծրագրի արտաքին քաղաքական դրույթներին։

Կուսակցության նախընտրական ծրագրի «Անկախ և հզոր պետություն. Արցախ, անվտանգություն և արտաքին քաղաքականություն» բաժնում ասված է.

«Հայաստանը պետք է վարի անկախ արտաքին քաղաքականություն՝ հիմնված բացառապես ազգային շահի և պետության հեռանկարային ռազմավարական զարգացման տեսլականի վրա: Մենք հայամետ և հայաստանակենտրոն ենք: Արտաքին քաղաքականության վեկտորն ընտրելիս պետք է առաջնորդվենք բացառապես մեր ազգային շահով: Մեր կազմած դաշինքները պետք է լինեն ոչ թե ընդդեմ որևէ կողմի, այլ բացառապես հանուն մեր նպատակների իրականացման»:

Ղարաբաղյան հիմնախնդիր

Արցախյան հարցի շուրջ կուսակցության դիրքորոշումը հետևյալն է. «Արցախը հայկական հարցի, Հայ Դատի անբաժան մաս է: Այս հարցում դիրքորոշումն անփոփոխ է՝ Արցախը պետք է վերամիավորվի Մայր Հայաստանի հետ: Արցախի անկախությունը մեզ համար մարտավարական նշանակություն ունեցող ժամանակավոր լուծում է»: Կուսակցության նախընտրական ծրագրում Արցախյան հարցի շուրջ կան հետևյալ առաջարկները.

  1. Ամրապնդել Հայաստանի Հանրապետության և Արցախի Հանրապետության ռազմաքաղաքական համագործակցությունը, տնտեսական, ֆինանսական, սոցիալական, մշակութային, կրթական համարկումը:
  2. Հայաստանն Արցախի անվտանգության, ինքնիշխանության և տարածքային ամբողջականության երաշխավորն է:
  3. Անհրաժեշտ է Հայաստանի և Արցախի Հանրապետությունների միջև կնքել ռազմաքաղաքական համագործակցության պայմանագիր:
  4. Շարունակել աշխատանքները Արցախի Հանրապետության միջազգային ճանաչման ուղղությամբ:
  5. Ջանքեր գործադրել Արցախն իր ապագային վերաբերող բանակցություններում որպես լիիրավ կողմ ներգրավվելու համար:

Անվտանգություն

ՀՅԴ նախընտրական ծրագրում բավական մեծ տեղ է հատկացված անվտանգության խնդրին, ինչի առնչությամբ մասնավորապես նշվում է. «Մենք ինքներս պետք է ապահովենք մեր երկրի անվտանգությունը՝ քաջ գիտակցելով, որ միայն պատերազմին պատրաստ լինելն է կանխում պատերազմի վտանգը: Այս հարցում միակողմանի զիջումների մասին հայտարարությունները միայն մոտեցնում և ավելի իրական են դարձնում պատերազմի սպառնալիքը»: Անվտանգության բարձրացման համատեքստում կուսակցությունը առաջարկում է.

  1. Ազգ-բանակ հայեցակարգի տրամաբանությամբ զարկ տալ հայրենական գիտական և տեխնոլոգիական մտքի վրա հիմնված ռազմա-արդյունաբերական համալիրի ստեղծմանը:
  2. Խրախուսել պրոֆեսիոնալ-կամավոր զինվորական ծառայության շրջանակի ընդլայնումը: Պարտադիր զինվորական ծառայության զորակոչված երիտասարդ զինվորի կողքին միշտ պետք է կանգնած լինի պրոֆեսիոնալ զինվորականը:
  3. Սպաների ու պայմանագրային զինծառայողների աշխատավարձերը համապատասխանեցնել արժանավայել ապրուստի պահանջներին:

Հայոց ցեղասպանություն

ՀՅԴ կուսակցության ծրագրում՝ որպես նպատակադրում նշվում է «Թուրքիայի կողմից հայության դեմ գործադրված եւ մինչեւ այժմ անպատիժ մնացած Ցեղասպանության ոճրի միջազգային դատապարտում, բռնագրավված հողերի վերադարձ և վնասի արդար հատուցում հայ ազգին»: Այս խնդրին անդրադառնում է նաև կուսակցության նախընտրական ծրագիրը՝ առաջարկելով ՀՀ արտաքին քաղաքականության օրակարգի անքակտելի մաս դարձնել Հայոց ցեղասպանության ճանաչման և փոխհատուցման հարցերը, բացառել Հայոց ցեղասպանության միջազգային ճանաչման գործընթացը թուլացնող որևէ գործողություն:

Սփյուռք

Եվ՛ կուսակցության ծրագրում, և՛ նախընտրական ծրագրում մեծ ուշադրություն է դարձված սփյուռքին ու սփյուռքահայությանը: Կուսակցության ծրագրում իբրև նպատակ սահմանված է. «ամրապնդել Սփյուռքի ազգային ինքնությունը և կազմակերպել քաղաքական դերակատարությունը՝ նրա կարողականություններն ուղղելու համար դեպի Հայաստանի պետականության հզորացում և Հայ Դատի հետապնդում»: Նախընտրական ծրագրում այս գաղափարը տեղ է գտել հետևյալ ձևակերպմամբ. «ՀՀ արտաքին քաղաքականության մեջ առաջնորդող սկզբունք համարել այն, որ Հայոց պետականությունը ոչ միայն Հայաստանի քաղաքացիների, այլև համայն հայության ազգային նպատակների իրականացման երաշխավորն է: Ըստ այդմ՝ ամեն ինչ անել սփյուռքահայությանը հայոց պետականության գործընթացում լիարժեք ներգրավելու համար»:

Վրաստանի հետ հարաբերություններ

Նախընտրական ծրագրում Հայաստանի Հանրապետության և այլ պետությունների միջև երկկողմ հարաբերություններից անդրադարձ է արվում միայն հայ-վրացական հարաբերություններին՝ նշելով, որ Վրաստանի հետ հարաբերությունները պետք է կառուցել բարեկամության ու ազգային շահերի փոխադարձ հարգանքի սկզբունքի վրա, ինչն էլ իր դրական ազդեցությունը կունենա վիրահայության իրավունքների լիարժեք իրականացման վրա:  

այլ նյութեր այս թեմայով


Ամենաընթերցվածը

օրվա

շաբաթվա

ամսվա

Եղանակ
Երևան
Ամպամած
Խոնավություն՝ 77%
Քամի՝ 9.66 կմ/ժ
0 C°
 
   
18.12.2018
   
19.12.2018
Հարցում

Կհաջողվի՞ արդյոք Փաշինյանին տնտեսական հեղափոխություն իրականացնել Հայաստանում։