ԵՐԵՎԱՆ 21 C°
ՀՀ ԿԲ -
  • USD - 483.94 դրամ +0,94 EUR - 512.2 դրամ +0,2 RUB - 7.88 դրամ +0,88 GBP - 595.54 դրամ +0,54
  • ՈՍԿԻ - 23 197,02 դրամ ԱՐԾԱԹ - 278,48 դրամ ՊԼԱՏԻՆ - 14 513,44 դրամ

Թուրքիա-ԱՄՆ համագործակցություն Սիրիայի հյուսիսում. ԱՄՆ-ի համար գնալով բարդանում քրդերի համար ժամանակ շահելը

aranews.net

Թուրքիան և Միացյալ Նահանգները թեև Սիրիայի հյուսիսում անվտանգության գոտի ստեղծելու ուղղությամբ արդեն կոնկրետ գործողություններ են իրականացնում, կողմերն ակնհայտորեն  չեն կարողանում հաղթահարել առկա տարաձայնությունները:

Թուրքիայի արտաքին գործերի նախարար Մևլութ Չավուշօղլուն Միացյալ Նահանգներին մեղադրել է անվտանգության գոտու ստեղծման բանակցությունները ձգձգելու մեջ: «ԱՄՆ-ի հետ բանակցությունները սկսելուց հետո արվել է առաջին քայլը՝ (անվտանգության գոտու) համակարգող կենտրոնի ստեղծումը... Բայց և միաժամանակ մենք մեր նախազգուշացումն ենք հայտնել, որպեսզի դա չվերածվի երկրորդ Մանբիջի (որտեղ ԱՄՆ-ը  չի կատարել Անկարայի առջև իր պարտավորությունները քրդական կազմավարումները դուրս բերելու վերաբերյալ)։ Որովհետև ԱՄՆ-ը պայմանավորվածությունների պատճառով, որոնք ունի ահաբեկիչների հետ, խոսքը չի պահում»,- ասել է Չավուշօղլուն լրագրողներին։ Նրա խոսքով՝ «ԱՄՆ վարքագիծը չի բավարարում Անկարային» և եթե ԱՄՆ հետ համագործակցությունն արդյունք չտա, իրենք կմտնեն այդ գոտի:

Թուրքիայի նախագահ Ռեջեփ Թայիփ էրդողանն իր հերթին հայտարարել է, որ Միացյալ Նահանգները մտադիր է Սիրիայում անվտանգության գոտի ստեղծել ահաբեկչական կազմակերպության (Թուրքիան Սիրիայի քրդական խմբավորումներին համարում է ահաբեկչական), և ոչ թե Սիրիայի համար:

Թուրքիան սպառնում է Սիրիայի հյուսիսում քրդերի դեմ ռազմական գործողություն սկսել արդեն բավականին երկար ժամանակ: Միացյալ Նահանգներն այս ընթացքում ամեն կերպ փորձում է կանխել Սիրիայում իր գլխավոր դաշնակիցների՝ քրդերի դեմ թուրքական գործողությունը՝ Սիրիայի հյուսիսում անվտանգության համատեղ գոտի ստեղծելու ծրագրով:

Ու թեև սեպտեմբերի 8-ի առավոտյան Թուրքիայի և Միացյալ Նահանգների զինված ուժերն իրականացրել են Սիրիայի շրջանների առաջին ցամաքային պարեկությունը Եփրատ գետից արևելք, որտեղ նախատեսվում է ստեղծել այդ գոտին, կողմերի հայտարարություններից և գործողություններից պարզ է դառնում, որ կողմերն այս հարցում միանգամայն այլ նպատակներ ունեն:

Արդյունքում թուրքական հերթական ռազմական գործողությունն ու դրա արդյունքում քրդական ուժերի պարտությունն անխուսափելի է դառնում: Միացյալ Նահանգները դժվար թե քրդերի համար ռազմական ուղիղ առճակատման մեջ մտնի ՆԱՏՕ իր դաշնակցի հետ, իսկ Թուրքիայի գլխավոր խնդիրն այսօր Սիրիայում, առաջին հերթին, քրդերի նկատմամբ հաշվեհարդարն է:

Սիրիայի քրդերի համար ստեղծված իրավիճակում որոշակի լուծում կարող է դառնալ Սիրիայի կառավարության և Ռուսաստանի հետ համագործակցությունը:

այլ նյութեր այս թեմայով


Ամենաընթերցվածը

օրվա

շաբաթվա

ամսվա

Եղանակ
Երևան
Պարզ երկինք
Խոնավություն՝ 33%
Քամի՝ 10 կմ/ժ
21 C°
 
14°  29° 
20.09.2019
16°  29° 
21.09.2019
Հարցում

Կո՞ղմ եք Ամուլսարի շահագործման հարցով հանրաքվեի անցկացմանը