ԵՐԵՎԱՆ -13 C°
ՀՀ ԿԲ -
  • USD - 483.94 դրամ +0,94 EUR - 512.2 դրամ +0,2 RUB - 7.88 դրամ +0,88 GBP - 595.54 դրամ +0,54
  • ՈՍԿԻ - 31,037.91 դրամ ԱՐԾԱԹ - 431.12 դրամ ՊԼԱՏԻՆ - 18,818.43 դրամ

Հայ-վրացական հարաբերությունների դինամիկան չպետք է պայմանավորվի երկու երկրների իշխանություններում տեղի ունեցող վերադասավորումներով

Հոկտեմբերի 15-ին կայացավ Վրաստանի վարչապետ Գեորգի Գախարիան պաշտոնական այցը Հայաստան, որի շրջանակներում Վրաստանի նորանշանակ վարչապետը հանդիպումներ ունեցավ ՀՀ վարչապետ Նիկոլ Փաշինյանի և նախագահ Արմեն Սարգսյանի հետ:

Ինչպես բնորոշ է հայ-վրացական հարաբերություններին, այս բանակցությունները ևս անցել են բավականին ջերմ մթնոլորտում: «Եթե ինձ հարցնեն, թե որոնք են իմ վարչապետության մեկուկես տարիների ձեռքբերումները, ապա առաջին հերթին կնշեմ Վրաստանի հետ նոր մակարդակի հարաբերությունների ձևավորումը», - նշել է Նիկոլ Փաշինյանը:

Սակայն Նիկոլ Փաշինյանի վարչապետության շրջանում հայ-վրացական հարաբերությունների նոր մակարդակը դեռևս արտահայտվում է բարձրաստիճան փոխայցելությունների հաճախակի դառնալով: Այս համատեքստում հետաքրքիր է Վրաստանի վարչապետի դիտարկումը, որ «չնայած նրան, որ երկուստեք մեր հարաբերությունները գնահատում ենք բարձր, սակայն մենք տնտեսության, մշակույթի և մյուս ոլորտներում կապերը զարգացնելու լավ հնարավորություններ ունենք»:

Երևանում կայացած բանակցությունների ընթացքում կողմերը քննարկել են հարցերի լայն շրջանակ: Մասնավորապես Հայաստանի և Վրաստանի վարչապետերն անդրադարձել են առևտրատնտեսական, տրանսպորտի, գյուղատնտեսության, մշակույթի ոլորտներում հայ-վրացական համագործակցությանը վերաբերող հարցերի: Նրանք կարևորել են տրանսպորտային հաղորդակցության բնագավառում համագործակցության հետագա զարգացման հեռանկարները: Կողմերը առանձնակի շեշտել են ենթակառուցվածքների բարելավման ուղղությամբ իրականացվող, մասնավորապես՝ Գոգավան-Գուգութի և Բավրա-Նինոծմինդա ավտոճանապարհների վերակառուցման աշխատանքների կարևորությունը: Փաշինյանն ու Գախարիան նաև անդրադարձել են տարածաշրջանային խնդիրների` կարևորելով միմյանց համար զգայուն հարցերի նկատմամբ հավասարակշիռ դիրքորոշման պահպանումը։ 

Սակայն բանակցություններն ավարտվեցին առանց կոնկրետ պայմանավորվածությունների, ավելին` կողմերը նույնիսկ, առնվազն հրապարակայնորեն, չանդրադարձան ընդամենը մի քանի օր առաջ` հոկտեմբերի 11-ին, Epress.am-ի լրագրողների մուտքը Վրաստան արգելելու հարցին:

Գախարիայի պաշտոնական այցի արդյունքներով հստակ պայմանավորվածությունների բացակայությունը բացատրելը այցի ճանաչողական բնույթով, հաշվի առնելով, որ Գախարիան նոր է ստանձնել Վրաստանի վարչապետի պաշտոնը, մի կողմից ընկալելի է, սակայն մյուս կողմից հայ-վրացական հարաբերությունների դինամիկան չպետք է պայմանավորված լինի երկու երկրներում իշխանության ներսում տեղի ունեցող վերադասավորումներով, ինչը Վրաստանում վերջին տարիներին պարբերական բնույթ է կրում:

 

 

 

այլ նյութեր այս թեմայով


Ամենաընթերցվածը

օրվա

շաբաթվա

ամսվա

Եղանակ
Երևան
Պարզ երկինք
Խոնավություն՝ 46%
Քամի՝ 3 կմ/ժ
-13 C°
 
-6°   
25.01.2021
-4°   
26.01.2021
Հարցում

Աջակցու՞մ եք արդյոք Հայաստանում ազգային համաձայնության կառավարության ստեղծմանը: