Դատական իշխանությունը կա և մնալու է բացառապես մասնագիտական գործունեության դաշտում․ ԲԴԽ նախագահ

• 10.06.2020, 13:04
•  Աշխարհ,  Հայաստան

Բարձրագույն դատական խորհուրդը ապաքաղաքական կառույց է։ Այս մասին, ինչպես հայտնում է Բարձրագույն դատական խորհրդի «Ֆեյսբուք»-ի էջը, ասել է Բարձրագույն դատական խորհրդի նախագահ Ռուբեն Վարդազարյանը: 

«Այսօր առավոտյան մամուլում հերթական ասեկոսեն են հրապարակել իմ՝ իբր «համակարգից հեռանալու իշխանությունների պահանջի» մասին: Ափսոսում եմ, որ ոմանք այդպես էլ չեն կարողանում ընկալել, որ Դատական իշխանությունը, Բարձրագույն դատական խորհուրդը և անձամբ ես ապաքաղաքական ենք: Ավելին, մեզ քաղաքական հարթություն ներքաշելու ցանկացած փորձ դատապարտված է ձախողման:

Ի դեպ՝ ԲԴԽ-ի որդեգրած այդ սկզբունքային մոտեցմամբ է նաև պայմանավորված, որ վերջին շրջանում հանրային տարբեր գործիչների կողմից զանգվածային լրատվության միջոցներով սփռվող մեզ թիրախավորող բազմաթիվ ասեկոսեները և կեղծ լուրերը մեր կողմից մնում են անարձագանք: Դատական իշխանությունը կա և մնալու է բացառապես մասնագիտական գործունեության դաշտում»,- ասել է Վարդազարյանը։

Վերջինս նշել է նաև, որ ԲԴԽ նախագահի խիստ պատասխանատու առաքելությամբ պայմանավորված՝ գործում և գործելու է բացառապես ՀՀ սահմանադրության և օրենքներով իրեն վերապահված լիազորությունների շրջանակներում, դատական իշխանության կողմից իր վրա դրված մեծ պատասխանատվության ներքո: