Բեռլինի իշխանությունները կարգելեն բնակիչներին տնից դուրս գալ առանց ծայրահեղ անհրաժեշտության

• 14.12.2020, 11:23
•  Եվրոպա,  Աշխարհ

Բեռլինի իշխանությունները կիրակի որոշում են կայացրել դեկտեմբերի 16-ից խստացնել կորոնավիրուսի դեմ պայքարի շրջանակում սահմանափակումները, հաղորդում է Der Tagesspiegel թերթը:

Պարբերականի տեղեկություններով՝ բնակիչների տեղաշարժը կսահմանափակվի. տներն ու բնակարանները թույլ կտան լքել միայն հիմնավոր պատճառով, օրինակ, գնումներ կատարելու, բժշկի այցելելու, դրսում սպորտով զբաղվելու կամ ընտանի կենդանիների հետ զբոսնելու համար: Կարգելեն ալկոհոլ վաճառել այնտեղ, որտեղ թույլ են տալիս անմիջապես օգտագործել այն, այսինքն՝ գլինտվեյնի վաճառակետերում, արագ սննդի կետերում:

Դպրոցները փակ կլինեն մինչև հունվարի 10-ը: Միևնույն ժամանակ ԳԴՀ-ի իշխանությունները ցանկանում են բաց պահել մանկապարտեզները: Նշվում է, որ Բեռլինում ծնողների 52 տոկոսը միայնակ է դաստիարակում իրենց երեխաներին, ուստի նրանք ստիպված կլինեն նորովի կազմակերպել իրենց աշխատանքային կյանքը դպրոցների և մանկապարտեզների փակման դեպքում: Այդուհանդերձ, ծնողներին կոչ են անում հնարավորինս երեխաներին տանը թողնել:

Մանրածախ առևտրի վաճառակետերը դեկտեմբերի 16-ին կփակվեն, բացի կենսական անհրաժեշտության ապրանքների խանութներից: Կշարունակեն գործել գրախանութները, հեծանվային, տնտեսական խանութները, մեծածախ առևտրի կետերը:

Կարանտինի միջոցառումները կխստացվեն ծերանոցներում և հիվանդ մարդկանց խնամքի հաստատություններում: