Արքեպիսկոպոս Ավագ Ասատուրյանը նամակ է հղել արքայազն Չարլզին

• 10.03.2015, 14:55
•  Աշխարհ,  Սփյուռք

Մեծ Բրիտանիայի արքայազն Չարլզի և նրա որդու Հարիի` ապրիլի 24-ին Թուրքիա այցելելու որոշումից հետո Իրաքի հայկական եկեղեցու արքեպիսկոպոս Ավագ Ասատուրյանը նամակ է հղել նրանց` նշելով Հայոց ցեղասպանության հարցում նրանց պատասխանատվության մասին. տեղեկացնում է Yerkir.am-ը` հղում կատարելով «Ակօս»-ին:   Նամակում արքեպիսկոպոսն ասել է. «Այս միջոցառումը ցույց է տալիս, թե ինչպես է քաջալերվում մի ազգի հիշողությունները ոչնչացնելը»:   Ասատուրյանը, որ Չանաքքալեի միջոցառումները որակել է «դաժանության և ժխտողականության հաղթանակ», հիշեցրել է 1915 թվականի իրադարձությունները «մարդկության դեմ հանցանք» որակող պետությունները, որից մեկը հենց Անգլիան է եղել:   Նշելով, որ Ուիսնթոն Չերչիլը 1915 թվականի կոտորածները «ցեղասպանություն» է որակել` արքեպիսկոպոսը գրել է. «Անգլիան խոստացել էր պատժել Ցեղասպանության մեղավորներին, իսկ 21-րդ դարում պարգևատրվում է մի ողջ ազգի հանցագործը»:   Հիշեցնելով նաև Հիտլերի հայտնի` «Ո՞վ է հիշում հայերի բնաջնջումը» խոսքը` Ասատուրյանն ասել է. «Ես ցանկանում եմ, որ արքայազն Չարլզը հիշի պատմությունն էլ, այս խոսքն էլ»: