Բեռլինում կբեմադրվի «Մուսա լեռան 40 օրը» ներկայացումը

• 13.03.2015, 10:58
•  Եվրոպա,  Աշխարհ

Բեռլինի Մաքսիմ Գորկու անվան թատրոնում «Ձյուն է տեղում ապրիլին» թեմայով 40 օր շարունակ միջոցառումներ կընթանան՝ նվիրված Հայոց ցեղասպանության 100-ամյա տարելիցին։ Այս մասին գրում է News.am-ը՝ հղում անելով Neue Zürcher Zeitung պարբերականին:

«Ցեղասպանության թեման մանկուց հետապնդում էր ինձ՝ որպես մարդկության պատմության մեծ վերք։ Միջոցառումների նպատակը ներկայացումների, ֆիլմերի և գեղարվեստական միջոցառումների միջոցով մարդկանց 1915թ. կատարվածը հիշեցնելն է և դրա հետևանքները վերաիմաստավորելը»,- հայտարարել է թատրոնի տնօրեն,  ծագումով թուրք Շերմին Լանգհոֆը, որը ներկայացման պրեմիերային  մասնակցելու հրավեր է ուղարկել Գերմանիայում բնակվող թուրք մտավորականներին և պատգամավորներին։

Միջոցառումների շրջանակում Բեռլինի Գորկու անվան թատրոնում բեմադրիչ ռեժիսոր Հանս Վերներ Կրոյսինգերի ղեկավարությամբ կցուցադրվի «Մուսա լեռ. դիմակայության օրեր» ներկայացումը, որը ցույց է տալիս փոքրաքանակ հայկական խմբի հուսահատ, սակայն հաջողակ պայքարը։  Ներկայացման դերասանները ականատեսների շուրթերով Գերմանիայի Բունդեսթագի արձանագրություններից և հայցերից մեջբերումներ են կատարում՝ տալով կոնկրետ անուններ և նշելով կոնկրետ թվեր։