Օբամայի կոչերը Կոնգրեսում սուր քննադատության են արժանացել

• 13.01.2016, 19:03
•  Ամերիկա

Կոնգրեսի առջև երեկ ծավալուն ելույթ ունենալով՝ Ամերիկայի Միացյալ Նահանգների նախագահ Բարաք Օբաման խոսել է երկիրը համաշխարհային ոստիկանի վերածելուց խուսափելու անհրաժեշտության մասին՝ միևնույն ժամանակ կարևորելով անվտանգության ու աշխարհում առաջնորդ դիրքերի պահպանումը:

Նախագահի պաշտոնում իր վերջին ուղերձում Կոնգրեսին, ինչպես և սպասվում էր, Օբաման ծավալուն անդրադարձ է կատարել ահաբեկչության դեմ պայքարին, որը, ըստ նրա, պետք է տարվի միասնական ուժերով և համակարգված:

«Մենք չենք կարող մեր վերահսկողության տակ վերցնել և վերականգնել ճգնաժամային իրավիճակում հայտնված յուրաքանչյուր երկիր: Առաջնորդությունը դա չէ: Դա ճահիճ տանող և թուլացնող ճանապարհ է: Բարեբախտաբար, գոյություն ունի ավելի խելացի մեթոդ՝ համբերատար և կազմակերպված մարտավարություն, ըստ որի՝ Ամերիկան անհրաժեշտության դեպքում կգործի ամերիկացիներին և իր դաշնակիցներին պաշտպանելու համար, սակայն գլոբալ հարցերում մենք մոբիլիզացնում ենք աշխարհը՝ համատեղ աշխատելու նպատակով», - այսպես է ձևակերպել իր տեսլականը Բարաք Օբաման՝ խոսելով ճգնաժամային իրավիճակներում ԱՄՆ-ի դերակատարության մասին:

Նախագահը մասնավորապես կոչ է արել Կոնգրեսին հավանություն տալ օրինագծին, որը ենթադրում է ամերիկյան զինված ուժերի օգտագործումն «Իսլամական պետություն» ահաբեկչական խմբավորման դեմ պայքարում:

«Եթե Կոնգրեսն իրոք մտադիր է հաղթել այս պատերազմում և ցանկանում է հստակ ազդակ ուղարկել աշխարհի տարբեր անկյուններում տեղակայված մեր զորքերին, ուրեմն պետք է թույլ տաք երկրի սահմաններից դուրս ամերիկյան զինուժի օգտագործումն ընդդեմ ահաբեկչական խմբավորման անդամների», - հայտարարել է Օբաման:

Սակայն, ելույթից անմիջապես հետո ԱՄՆ հանրապետական կուսակցությունը քննադատել է նախագահ Բարաք Օբամային: Պաշտոնական պատասխանով հանդես է եկել Հարավային Կառոլինայի նահանգապետ Նիքի Հեյլին: Նահանգապետը նշել է, որ ԱՄՆ ադմինիստրացիայի ղեկավարի մոտ ամենից լավ ստացվում է ճոխ ու ամպագոռգոռ խոսել:

«Դժբախտաբար, Օբամայի նվաճումները հաճախ չէին համապատասխանում նրա շքեղ բառերին: Իսկ որ ավելի վատ է՝ մենք բախվում ենք սեպտեմբերի 11-ից հետո ընկած ժամանակահատվածում կարևորագույն սպառնալիքի՝ համաշխարհային ահաբեկչության կողմից, իսկ մեր նախագահը չի ուզում, կամ չի կարող դրա դեմ միջոցներ ձեռնարկել: Նա միայն կարող է մի շարք գեղեցիկ բառեր իրար հետևից շարել», - հեգնել է Հեյլին: