Եվրոպայում անվտանգության խստացված միջոցառումները չեն նվազեցնում ահաբեկչական սպառնալիքը

• 25.08.2017, 18:30
•  Եվրոպա,  Աշխարհ

Emilio Morenatti / AP

Իսպանիայի խոշոր քաղաքները Կատալոնիայի ահաբեկչություններից հետո ուժեղացնում են անվտանգության միջոցառումները՝ հանրային վայրերում ոստիկանների քանակն ավելացնելով և փողոցներում ցանկապատեր դնելով: «Իսլամական պետություն» ահաբեկչական խմբավորման զինյալներն օրերս իսպաներենով տեսանյութ են հրապարակել սոցցանցերում՝ Իսպանիային հասցեագրված սպառնալիքներով: Ընդ որում, ահաբեկչության սպառնալիքը շարունակում է բարձր մնալ ոչ միայն Իսպանիայում, այլև արևմտաեվրոպական մյուս երկրներում: Նախօրեին Ռոտերդամում (Հոլանդիա) ոստիկանությունը վերջին պահին չեղարկել է ամերիկյան Allah-Las ռոք խմբի համերգը՝ ահաբեկչության սպառնալիքի պատճառով։ Քաղաքապետ Ահմեդ Աբութալեբը հայտնել է, որ համերգասրահից ոչ հեռու ոստիկանությունը կանգնեցրել էր իսպանական պետհամարանիշներով ֆուրգոն, որում եղել է մի քանի գազային բալոն։ Աբութալեբը հայտնել է, որ համերգը չեղարկվել էր իսպանական ոստիկանության կողմից ստացված ահաբեկչական նախազգուշացման պատճառով։

Չնայած ձեռնարկվող միջոցառումներին՝ ինչպես տեղական մակարդակով, այնպես էլ համաեվրոպական (խորցվում է տարբեր եվրոպական երկրների ուժային և հետախուզական կառույցների միջև համագործակցությունը)՝ փորձագետները կարծում են, որ Արևմտյան Եվրոպայի երկրներին չի հաջողվի խուսափել ահաբեկչությունների նոր շարքից. այդ միջոցառումները կարող են ապահովել քաղաքացիների անվտանգությունը միայն կարճ ժամանակահատվածով: «Իսլամական պետությունը» Մերձավոր Արևելքում պարտությունների ֆոնին գրոհայիններն այժմ փորձելու են սփոփանք գտնել Եվրոպայում ահաբեկչությունների միջոցով սարսափ տարածելով: Ընդ որում, ինչպես ցույց է տալիս Բարսելոնայի ահաբեկչությունը, ինչպես նաև դրա սպառնալիքը Ռոտերդամում, այժմ գրոհայինների թիրախում բացի ավանդական դարձած Փարիզից, Լոնդոնից և Բրյուսելից հայտնվել են համեմատաբար անվտանգ համարվող այնպիսի եվրոպական երկրներ, ինչպիսիք են Իսպանիան և Ֆինլանդիան:

Միևնույն ժամանակ ահաբեկչությունները կանխելը ուժայինների համար գնալով ավելի է բարդանում: Ահաբեկչություն իրականացնելու համար այժմ գրոհայինները պայթուցիկներ և զենք չեն օգտագործում. իրենց սև գործն անելու համար բավարար է միայն ավտոմեքենա կամ դանակ ունենալը: