Ներքաղաքական դասավորվածությունն Արցախում համապետական ընտրություններից հետո

• 02.04.2020, 11:47
• «Հայացք» վերլուծական կենտրոն
•  «Հայացք» վերլուծական կենտրոն,  ԼՂՀ,  Վերլուծություն

Արցախի Հանրապետության ԿԸՀ-ն հրապարակեց մարտի 31-ին Արցախում տեղի ունեցած համապետական ընտրությունների արդյունքները։

Ըստ նախնական տվյալների, Ազգային Ժողովում ընդգրկվելու է 5 քաղաքական ուժ՝ «Ազատ հայրենիք-ՔԴՄ դաշինքը» 16 մանդատով, «Միասնական հայրենիք» կուսակցությունը՝ 9, Արցախի «Արդարություն» կուսակցությունը՝ 3, ՀՅ Դաշնակցություն կուսակցությունը՝ 3, Արցախի ժողովրդավարական կուսակցությունը՝ 2։

Մանդատների նման բաշխավծության պարագայում ակնհայտ է, որ քաղաքական ուժերից ոչ մեկին չի հաջողվում 33 տեղ ունեցող խորհրդարանում ստանալ բացարձակ մեծամասնություն։ Ուստի, ամենայն հավանականությամբ, քաղաքական ուժերը կփորձեն գնալ կոալիցիաների ձևավորման ճանապարհով։ Արայիկ Հարությունյանն արդեն իսկ հայտարարել է բոլոր քաղաքական ուժերի հետ համագործակցելու պատրաստակամության մասին։ Առավել հավանական կոալիցիան «Ազատ հայրենիք-ՔԴՄ դաշինքի» և ՀՅ Դաշնակցություն կուսակցության ու Արցախի ժողովրդավարական կուսակցության միջև է՝ հաշվի առնելով անցյալում այս քաղաքական ուժերի կոալիցիոն համագործակցության փորձը։

«Միասնական հայրենիք» կուսակցությունը և Արցախի «Արդարություն» կուսակցությունը, ըստ երևույթին, հավակնելու են ընդդիմության դերին։ «Միասնական հայրենիք» կուսակցությունը նախագական ընտրություններում աջակցել է երկրորդ փուլում Արայիկ Հարությունյանի մրցակից Մասիս Մայիլյանին, իսկ Արցախի «Արդարություն» կուսակցության ղեկավար Վիտալի Բալասանյանը, չնայած դեռ չի հայտարարել երկրորդ փուլ անցած թեկնածուներից որևէ մեկին աջակցելու կամ ընդհանրապես ոչ մեկին չաջակցելու մասին, դժվար թե կոալիցիոն համագործակցության գնա «Ազատ հայրենիք-ՔԴՄ դաշինքի» հետ՝ հաշվի առնելով պաշտոնական Երևանի հետ առկա տարաձայնությունները։

Ինչ վերաբերում է նախագահական ընտրություններին, ապա Արայիկ Հարությունյանն ապրիլի 1-ին տեղի ունեցած իր մամուլի ասուլիս ընթացքում որևէ մտադրություն ցույց չտվեց՝ բողոքարկելու ընտրությունների արդյունքները, չնայած նրան բավական քիչ ձայներ էին պակասում առաջին փուլում հաղթանակ տանելու համար։ Մյուս թեկնածուների պարագայում բողոքարկման հավանականությունն ավելի փոքր է, բացառությամբ թերևս Մասիս Մայիլյանի:

Փաստացի, կախված նախագահական ընտրությունների արդյունքից, Արցախում կարող է ձևավորվել երկու իրավիճակ։ Առաջինի դեպքում, եթե նախագահ ընտրվի Արայիկ Հարությունյանը, նա կձևավորի կառավարություն, որը կունենա ամուր հենարան խորհրդարանում՝ ի դեմս կոալիցիոն բացարձակ մեծամասնության, կամ 16 մանդատանոց խմբակցության։ Երկրորդ դեպքում, եթե նախագահ ընտրվի Մասիս Մայիլյանը, նա կձևավորի կառավարություն, որը չի ունենա քաղաքական հենարան խորհրդարանում, քանի որ խորհրդարանական ուժերից միայն «Միասնական հայրենիք» կուսակցությունն է աջակցել նրան ընտրություններում, իսկ մյուս քաղաքական ուժերի հետ «Միասնական հայրենիք» կուսակցության այնպիսի կոալիցիան, որը մեծամասնություն կունենա, բավական քիչ հավանական է։